Hnuk January 3 hnin vaengah Shwe Pyi Ta Khun company loh mobile SIM - card pakhat ah kyat 5000/- neh moeh ayalh hlan vaeng ah kayoih nitila olthang cana taenglamkaloh hoenah akhueh tih yaksak nah akhueh. Hekah olthang he Kol ram khui kah journal neh ramtloe lamkah olthang journal cana donglamkaloh apung aka la athut utih atueng sak uh laom.

Hekah olthang he tah Kol ramkhui ah SIM - card pakhat ah kyat 500,000/- neh ayol bik alai utih ahno nala a om uhdongah thlang tom loh phone boeih apom uthai pawn ni tidongah boeih ah ako hoe uh.

January 9 hnin ah ngawn tah Myanma telecommunication chief engineer loh kyat 5000/- neh kayoi ni tihe danbu nen khaw saeh mabang nenkhaw saeh acoeng thai rhoe rhoe moe nih tila olthang kalo kung rhoek taengah athui caih.

Shwe Pyi Ta Khun  company loh kyat 5000/- neh yoih ham ah president office taeng ah thang thui nah kakhueh uhcoeng tila athui tih, telecommunication long ngawn tah kai mih neh bong yong uthae pawt angawn tah tahae kabang la sai thai mah pawh tila athui.

Company loh kyat 5000/- phu SIM-card kayoih ni tihe athui vaengah barhan bii bi thlang neh rhaengpuei rhoek loh phone ahno nauthai ham, khodaeng rhai nah hma taa sak ben ah tha hlue thako la thum ham kangaih dongah tlam he kasai tila athui. Kolram ah  phone neh ol thui phu he minute pakhat ah Ks.25/- neh athui uh he bahoeng yet aih, atak tak ah koi nih Ks. 5/- ni paek tueng laom tila media cana taengah athui thil.

Kolram taeng kah Thailand ram ah SIM card ayoe lam pataeng apaek laom tih pakhat ah bath 50/- lamkaloh bath 100/- neh ayoih uh bangla India ram khui ahkhaw SIM card pakhat ah rupee 50/- lamkaloh rupee 100/- neh ayoih uh laom.

Hlaem kumthai  lamkaloh Kol ram khui ah electric meter hno na phu meter pakhat ah ks.25/- lamkaloh ks.35/- asang saktih percentage 40% asang sak. Daak(post) neh hno pat phu he let 10 asang sak, percentage lamkoi nih 1000% asang sak. Rangoon khui kah khopuei kahil train ngol phu he khaw ks.10/- lamkaloh ks.100/- hil ah asang sak. High way train phu neh telephone phu khaw boeih asang sak hang.

Kol ram khui ah aso ben ah tah democracy  thovael nah akhueh vaengah adang ben ah atah hnopai phu ueng ueng asang sak hang li laom.