Document Actions
Mtp News
Up one levelNuham Suu Kyi Kolram Hoelpoeng la Omtangpawn aa titih Mingnaham Pago la Yincoeng
August 14 : Nuham Suu Kyi hetah amah Imm khui ah khing khing auup uh lamkaloh loih tih avoei khat nala Kolram ah hoelpoeng cala om tangtang pawn aa titih mingnaham la hnin Sunday mincang 8:00AM yuyan ah Pago khopuei apha coeng laom.
Canada Hoelca loh Kol Refugees rhoek Bom naham ah Cetbing ciit tih Tangka (Fund) Atlam
August 13 : Canada hoelca Mr. Rod Germiane loh maeng(mile) thawngli 4000 cycle (cetbing) ciit tih Kolram rhalkaap kut hmui khui lamkaloh kayong refugees rhoek kah sading naben ah bom naham angaig dongah Cetbing ciitih American Dollar $30000 adang tila minglaom.
Kolrhalkap Boei Pahnih Rhenten la Atuuk uh
August-12: Hnuk vaeng kah Kyaingtung kungsut Triagle Region Commander rhuem tahae ah Tatmadaw investigating neh auditor general Gen. Kyaw Phyo neh tahae ah Triagle Region Commender lakaom Brigadier General Than Htun Oo amih rhoi he August 8 hnin ah atuuk uh laom tih tahae Naypyidaw ah olcaek nah akhuehuh tila minglaom.
KIA Kachin neh Kol rhalkaap Laklo ah Kah nah Koepom
August 15, 2011 : KIA neh Kolrhalkap barhan laklo ah hnin khothun khovang ben 3:15 PM yunyan lamkaloh atong tih khonoek lung pakhat tluk kaap arhoi tila minglaom.
FEC Ahnawt Pawn ni
August 16, 2011: Kolram khui ah American Dollar yueng la ahno nah FEC (Foreign Exchange Certificate) he Bank kungpuei( central bank) lamkaloh ahnawt vitih tangka tho phu koep thovael nah kasai nitila Central Bank mawt kung U Than Nyein loh humtun na uthae ah athui tila minglaom.
Dollar Phu Koep Tla thuk
August 17, 2011: Hlaem ah poeng benkah tangka tho dongah American 1 dollar he Koltangka Kyat 757/- bueng apha tila minglaom. Hnuk yalh Friday hnin ah 1 dollar neh kyat 764/- tho thai laom. FEC tho phu hengawn tah 1 dollar ah kyat 700/- caek daek ni sut apha coeng laom.
Kol kho la Koep Namael Uthai coeng tila U Thein Sein loh athui
August 18 : Kolram kamawtkung U Thein Sein loh kho neh ram arhoeng nahang thai ham bongyong uthae silamtah rhen bii bi ham angoe coeng, barhan long khaw rhoep na uthae ham ah thoka sut ka ong tila athui tih ramtloe kapha Kol thlang boeih Kol kho la koep nalo uthai coeng tila khue nah akhueh.
U Thein Sein kah Thlang akhue he Khokung rhoek loh Kayum pawh ati
August 19, 2011 : Ramtloe lakapha rhoek boeih Kolram la namael uthai coeng tih ramrhoeng naben ah bii tluep tluep nabi uh ham la mawt kung U Thein Sein kah thlang khue nahe kho ram thovael hang thai mahpawh tila lungpok carhuep kamuk khokung rhoek loh ahnoel acawt laom.
Dollar 1 neh Kol tangka Kyat 950/- la Rhaep Akhueh coeng ati
August 19, 2011 : American dollar 1 dollar he Kol tangka kyat 950/- la rhaep akhueh coeng tila Rangoon khui ah moeh athui uh hang nah thoeng hang.
Somalia Refugees Camoe rhoek Kang Duek
August 20, 2011: Ethiopia refugees camp pakhat ah mul rhung rhung thoh nahil ah Somalia refugees camoe rhoek kangduekcoeng tila UNHCR benlamkaloh athui.
Kol ram ah Sui phu Voei Sang hang neh Atloe Olthang cana
August 20 , 2011 : Voei voei akasang hang diklai hman kah sui phu asang hang dongah Kol ram khui akhaw sui phu voei sang hang van. Hnin ah academy akhawk shwe 1 kyattaa ah Ks.703,500 /- apha hang tila minglaom. Sui phu asang hang coeng dongah Sui kalai kung rhoek yol thuk tila minglaom. Wolrd gold 1 aungcah ah $1851 apha laom. American dollar phu hekhaw koep koep tla thuk tih tahae ah US $1 dollar ah koltangka Ks.723/- neh atho uh.
Yal khat Khuikah Kolkho Hnopai Phu
August 21, 2011: Ramtloe (Foreign)tangka neh la khah kadang rhoek Kolram khui neh ramtloe ah bii kabi Kolthlang boei boeih kah adang uh la khah khuilam kaloh mangmu(tax) he adang uhkhui lamkaloh 10 % vawk apaek uhdae tahae ahngawn tah 2% bueng mah paepawn saeh tila financial neh Mangmu ministry lamkaloh hoe nah akhueh pah.
Isreal loh Bomb neh Ahaeh thil dongah Palestian Thlang 15 Duek
August 22, 2011 : Gaza strip ah Isreal loh vanlamkaloh bomb neh ahaeh thil dongah The Arab League loh puenpa la ngoltun nah akhueh utih hebang khoboe rhamlang he aom ham aom moe nih tila ahnoel acawt uh.
Kol ram Kho tae 5,000 Eclectricity Paek ham, Chin ram Haka thum
August 23, 2011 : Ministry of Industry No. 2 ( Cet hmuh 2) lamkaloh Kol ram pumtom kah khotae 5000 ham ah electricity kapaek ni tila hlaem paek ah athui tih Chin ram Haka hekhaw paek ham cainah kakhueh uh tila Chin ram kah aham ca la kaom rhalkap uniform kadul rhalboei rhuem U Hung Ngai loh athui.
India Small Project Bomnah USDP(Pyi Khine Phyo) Party ham lat Ahno nani
August 24, 2011 : India barhan loh Chin ram hipnaben(social) ahhno naham apaek so ah USDP (Pyi Khine Phyo) party khui ah kun naham, thlang coi naham lat ahno nani tila Chin ram Thantlang kho ah USDP party assembly humtun na ah ol tloek nah akhueh uh coeng tila minglaom.
Toih thing Kahuen Kolrhalkap, KIA loh Mat akah
August 25, 2011: Cuek mincang ah Kachin ram Waimaw kho, Samaa kho ca ah kho khui kah toih thing cana Kol rhalkap rhoek loh ahuen utih aphueih uhli vaengah KIA rhalkaap rhoek loh akah u dae Kolrhalkaap thlang pakhat duek tila minglaom.
Malaysia kah Refugees rhoek Kol khola Athak pawnni tidongah Luekueng uh
August 25, 2011: Malaysia ram khopuei Kaulalampur ah barhan thlang rhoek taengah Kol ramkah refugees rhoek akut dawn dongah cahang akoelh pautih anam sak uh, mueihlip cana khaw aloh pa uhdongah Kol ram la n’thak ham la aom coeng he a tidongah luekueng uh.
Badongah Kol Tangka Ueng Voei Asanghang?
August 26: 2011 – Koltangka he yaak noek pawh, tawng noekpawt hil ah rhih ham koi la voei asang hang dongah ramtloe la bii kabi rhoek hamkhaw saeh, Kolram khui ah dollar neh bii kabi rhoek khaw saeh anah la nganboh la adang uh laom.
Badongah Kol Tangka Ueng Voei Asanghang?
August 26: 2011 – Koltangka he yaak noek pawh, tawng noekpawt hil ah rhih ham koi la voei ueng asang hang dongah ramtloe la bii kabi rhoek hamkhaw saeh, Kolram khui ah dollar neh bii kabi rhoek hamkhaw saeh anah la nganboh la adang uh laom.
Ramtloe la Kapha Kolthlang Halo uhlaeh tila Dr. Nay Yin Latt loh Koep Akhue
August 26, 2011 : Ram ham ah titih bii kabi(politics) dong ah ramtloe la kapha boei boeih pakhat khaw tholh palh nah kanlo uhmah pawh yoei koek cala hamael ulaeh tila mawtkung U Thein Sein kabawm kacaem kung( president adviser) Dr. Nay Yin Latt loh hlaem August 25, 2011 hnin ah RFA olthang taengah hoe nah akhueh tih athui.
Kol Tangka Thawngdong ah Kol ram Kho Po pawnni tila Ngaithuen nah Apaek coeng
August 27,2011 : Koltangka ueng asang hang he atue-acan neh rhaep aloe la hno nasai uh thaipawt tih yai kawt la kho vawk nasak uh hang ahngawn tah khueh tawnnaben(economic), hipna uthae(social)ben tangkatung naben, lamkaloh patoeng khoram (politics) ben la ha hoi uh hang vitih rhai nah n’tawng uh khung daeng pawn ni tila mawtkung kabom kacaem kung khueh tawn naben kah thlang cueih U Myint (president’s economic adviser) loh ngai thuen nah apaek coeng.
UN Imm Bomb neh Adae, Thlang 18 hlai Duek
August 28, 2011 : Nigeria ram Abuja khopuei kungsut United Nation (UN) imm puei ah bomb apok sak khungdaeng tih thlang 18 thlai duek tih imm pali la athong uh boeih ah rhawk tila si imm kah thlang pakhat kah olthui he olthang pakhat dongah atueng sak.
Kol Thlang 200 American ram, North Carolina ah Hurricane Irene dongah kho apo coeng ati
August 28, 2011 : Atlantic mikbawt tuivapuei (ocean) Eastern America lamkaloh vawl vawlh ayai la kathoih 1 hour ah maeng 80(120km/h) neh ka hli Hurricane Irene kho hli hetah North Carolina tuivakaeng ben kah kho cana ah moeh hli coeng tih Saturday hlaem khoyin 0730 local (1130 GMT) vaenglam kaloh hli tih 36 hour khui ah hli nitla minglaom. Hurricane Irene thawng dongah tui phu 12ft(4 meter) sung boek hang coeng tih luekueng ham bahoeng om tila minglaom.
Naypyidaw ah Longhoi loh Thlang ayo, 2 duek
August 29, 2011 : Naypyidaw district, Zeya Thiri, Khet Aye khotae ben ah kho moeh tlan tih longhoi cana muep along dongah August 26 hnin hlaem ben ah huta pahnih duek laom. August 25 hnin, khoyin vaengah ah kho muep atlan dongah Naypyidaw taeng Pyinmana kho benlam kaloh long hoi tui neh kungnawt acuk dongah Khet Aye khote ah kaom Ma Mar Mar Lwin neh Ywa tit kung ah kaom Ma Aye Mar amih rhoi he ayo tih duek laom.
Yalh khat khui kah Kol ram Hnopai Phu
August 29, 2011: Hlaem Saturday neh Sunday hnin ah American 1 dollar ah Koltangka Ks.725/- apha de hnin lamkaloh Ks.700 /- kah adang koep apha.Matupi ah ngawn tah 1 dollar ah Ks. 630/- neh tho thai tila ming laom tih tahae Matupi ah Australia 1 dollar Ks. 700/- neh Malaysia 1 ringgit Ks.230/- tho thai tila minglaom.
Kol ram kah Tangka Phaisa kawng
August 30, 2011 : Kolramkhui ah ahmuep la vawk athak utih ayoih uh Japan kah asai super custom motor car cana he American dollar neh dan tat vitih dollar phu koep asang naham kasai ni tila No.1, 2 industries ministry, Union minister U Soe Thein loh athui.
Hmata Thlang rhoek ham( International Day of the Disappeared )Akhueh pah
August 31, 2011: Khat neh khat kah naben ben (conflict) aom nah ahmuen ko ah barhan neh atloe lungpoek carhuep kamuk rhoek loh rhai nah hma ta naham ti tih thlang rhoek he yaak sak nah akhueh mueh la, agaih pawt akhaw angaih akhaw thalaeng atuuk u tih akhuen lam kaloh akho laeh cana baat athuut patih, ulong khaw ming nathai pawt hil ah asai uh cana he diklai hman ah muep aom dong ah thlang tom loh aming nathai ham , hnilh nathai pawt ham ngaih nah akhueh uh dongah Hmata Thlang rhoek ham( International Day of the Disappeared ) khohnin August 30 hnin he ahmoel uh tih akhueh pah.
Rakhine khopuei Sittwe ah Bomb pok, Thlang 7 Duek
September 1, 2011 : Rakhine ram Sittwe khopuei kah Te chawng kho ah thlaem 31 hnin khothun ah bomb pok tih ayol bik thlang 7 duek tila minglaom.
Kol rhalkap rhoek Amamih neh Amamih Kaap uthae, 3 duek 4 Bangha adang
September 1, 2011 : Hlaem Tuesday August 30 hnin ah Kol ram ah alen bik Mandalay- Muse ramri hno pai khuen nah motor car longpuei ah Kol rhalkap amamih neh mamih akah uthae dongah 3 duek tih 4 bangha adang uh tila minglaom.
Chin Thlang 11, Mizoram lamkaloh Baat Avai
September 2, 2011 India northeast ben kah Mizoram state Champhai district Ngur kho ah akaom rhoek Chin thlang11( imm 7) rhoek he August 26 hnin ah kho ka-uk kataem kung rhoek loh baat avai tila minglaom.
Kol ram ah Dollar neh Sui phu Sang hang
Setember 3, 2011 : Rangoon khueh tawn naben market ah American Dollar phu koep asang hang dongah Sui phu khaw koe sang hang laom. Academy akhawk Shwe ta kyatta Ks.713,500/- hilsang laom. American 1 dollar ah kol tangka Ks.736/- lamkaloh ks. 771/- hil aphu koepsang hang laom dongah Kol ram khui kah sui phu loh koe ahloem hang van.
Kol ram ah Internet Koep Apit Balcoeng
September 5, 2011 : Kol ram ah Internet neh paeh tlaih tih hnuk hlaem vaeng lamkaloh apit ramtloe lamkah asai uh Kol olthang website cana direct la hnukyalh ah sawt thai laom coeng dae hlaem lam kaloh boeih koep apit bal coeng tila minglaom.
Chin refugee, Camoe Pathum kah Anapa Malaysia ah Mat aboh Utih Duek
September 5, 2011: Chin refugee, Pa Za Thio, camoe pathum kah anapa hetah hnuk saturday khoyin 11:00PM yunyan ah Puchong, Kaula Lampur, Malaysia ah Kalaa thlang rhoek loh mat aboh utih duek tila minglaom.
Thlang Kunthuk Kunhang(migration)ben Uktaem nah Australia Rhainah Atong
September 6, 2011 : Australia ram ah bakuep ham bih nah kakhueh rhoek he atloe ramla koep athak tih bihnah kakhueh rhoek soah hno sai ham oltloek nah khueh ham he coeng thai voel mahpawh tila Australia barhan kah danbu ben kah kabom kacaem kung aham ca pakhat loh athui.
Kum 4 Katling Huta ca Anapa ben loh Athae akha nah
September 6, 2011 : Chin ram Haka kho ah tahae hla 3 hnin hlaemben 3:00 pm vaengah akum 4 tluk katling coeng huta ca pakhat tah anapa ben loh athae akha nah tila minglaom.
Yu Asui uh tih Ook tholh dongah Thlang 5 Duek, 27 Si Imm Apha
September 7, 2011: Irrawady division Lah Pawtta district tuiva dongah hanyo thuk yu ming neh aben pungkhui kah tui he yu asui uhtih a ook tholh uhdongah thlang 5 duek tih thlang 27 si imm la ayong uh puei tila ming laom.
Kol ram ah American Dollar Phu Bahoeng Nah
September 8, 2011 : Si thae (drug) aphun phun yoih nabe neh ahmuep la bii kabi rhoek lamkah adang uh American dollar neh ramri lamkaloh patoeng Rangoon la akhuen uh dollar dongah tangka thophu atoem asang bahoeng nah hang tila tangka tho naben ah bii kabi rhoek loh athui tih minglaom.
American ah Sushi Company kakhueh kung Kol hoel ca Obama loh Apomsang
September 9,2011: Mawtkung Mr. Obama loh bii muep ka pae thlang rhoek he apom sang na bang ah white house la akhue tih honor apaek uh khui ah North Carolina state ah kaom Kol hoel ca kah Hissho Sushi company kakhueh kung U Phillip Maung khaw thum tila minglaom.
Kol kho Khui ah Thakham Motor car 5000 hlai Maesot ah Sut Ahmoek uh
September 10, 2011: Kolkho benla thakham mortor car 5000 hlai Thailand neh Kol ramri kho Maesot ah sut ahmoek uh tila Thai rat online olthang dongah atai tih atuueng sak.
Bank ah Tangka pu Phu 2% Athumh Pathuk dong ah Acan rem
September 11, 2011 : September 1, lamkaloh atong tih Bank ah tangka pu vaengah acaa sai he 2% athumh pathuk coeng dongah tangka pu thlang rhoek acan rem hang tilam he thlang cueih rhoekloh ahmuh.
Khokung rhoek Amamih kah Catham cacaang nah Im ah Acang sakthai Pawn eya?
September 12, 2011: Paliament khui ah private cacang nah im cana ah khokung rhoek amamih kah asingyoe neh catham cang nah im cana sai nathai ham ah dan bu pakhat he hlaem vai Wednesday hnin ah oltloek nah akhueh laomcoeng tih tekah cacang nah im ah barhan loh akhueh pah Kol catham cana neh atloe subject cana khaw cang thai tila om tih kho kung rhoek kah catham cana cang thai pawn eya tikah ngai uep nah moeh thoeng hang laom.
Indonesia Ka pha Refugees rhoek
September 13, 2011 : Australia barhan longhe Malaysia ram neh refugees rhoek tlip tloep tho arhoi nah hno pakhat he asai laom. Barhan kah hno sai he danbu neh vai arhoi patlaom tila Australia ram kah kasangkoek lai thui nah imm lamkaloh hoenah akhueh laom. Hekah hnosai nahang caai nah hetah Australia benlam kaloh aram ah baekuep ham bihnah kakhueh thlang 800 he Malaysia la tloep thak laom vitih Malaysia kah thlang 4000 khue hamah hna tlaak nah akhuehlaom.
Chin hoelca Olthangthen kathui USDP(Pyi Khaing Phyo) loh Avai
September 14th, 2011 – Chin ram khui kah barhan rhoek loh American hoel la kapoeh Chin hoel ca olthang then Chin ram khui ah kathui thlangpakhat tah September 10 hnin ah avai u he USDP(Pyi Khai Phyo) kah kut ngo ni tila USDP party kah hlang pakhat loh athui.
Kacim Kacaih Pawh Caak Si tuii Tone700 hlai Atuuk uh
September 15, 2011 : Taluk ram ah danbu neh kavai arhoi pawh caak si tuii arhuem cana koep athong uhtih yoih naben kham hamla asai tih Taluk ram pumtom neh avai arhoi la hno asai uh hang dongah thlang 32 ngawn atuuk uhcoeng laom.
Kol Refugees rhoek Aram la mael ham EU neh Kol Minister Humtun nah Akhueh rhoi
September 16, 2011 – Amah poek ngaih ah ako loh ahuem atah koep kamael refugees rhoek ham ah bii tat sai naben along a im cana oepsoeh la kakhueh coeng tila Kol ramkah Minister Lt. Gen. Thein Htay loh athui.
Kol ram ah Apit uh Website cana Koep Asawt Uthai balcoeng
September 17, 2011 : Kol barhan thai rhoek loh moeh ayalh saktih uca a ca khaw asawt sak pawh website Voice of America(VOA), Reuter, The British Broadcasting Corporation (BBC) kah website cana asawt sak thai coeng tila ming laom.
Kol Barhan rhalkap loh Kachin ram kah Kho cana Hmai neh a hlae tih Ahoeh pah
Setember 18, 2011 : Kachin Independence Army KIA rhoek neh Pyi Khaing Phyo rhalkap rhoek kaap uthae tih barhan rhlakap rhoek ahnuk la noe noe anong uhang vaeng ah Kachin ram kah khotae cana hmai ahlae patih ahoeh patih acaeh taak uh tila olthang yaak laom.
Nuham loh Kol ram ah Arhilh kaom Thovaelnah M’hmuh hang coeng ati
September 19, 2011 : Kolram khui ah arhilh kaom thovael nahang ben hmuh hang thai coengtila Kol ram democracy mawt kung Nuham Suu Kyi loh athui laom. Alamhma cuek la NLD kungpuei imm ah ahno na uh International of Democray ahno nauh ah tahae kabangla nuham loh athui laom.
Facebook neh Twitter cana Hno naham Acan ka dang thaipawh tila Nuham Suu Kyi loh athui
September 20, 2011 : Bii bahoeng apung dongah facebook neh twitter cana bang social network website cana he kahno nathai hlan ni tila nuham Aung San Suu Kyi loh athui.
Kolram kah Angaen Private Bank ah Tangka Tho thai laom ni
September 21, 2011 : Kol barhan loh tlal abuem tih tlal apit private bank cana loh tangka tho naben he tahae atah koep ah tangka tho nah akhueh uh thai coeng tila olthang cana thoeng laom.
Camoe Rhalkaap Kol ram ah Om pawh tila Defense Minister loh alu Ahinghuen
September 21, 2011 : Kai mih Kol barhan rhalkaap khui ah mavaeng akhaw akum katling hlan camoe rhalkaap la kahno na uh moe nih, kakhueh uh moe nih, aom rhoe rhoe amoe nih tila Lt. Gen. Hla Min loh alai baat baat akuuet tih athui.
Political Prisoner Thlang 300 Bueng ni Atongtai coeng Ati
October 19,2011: Kol ram pumtom ah kho neh ram ham ah a thoh atat uh dongah rhalkaap barhan loh atuuk uhtih thong ah a-up(political prisoner) thlang 600 bueng ni thong atlaak uh, tahae ah thlang 300 hlah laom coeng tih thlang 300 ni atong tai coeng tila mawtkung kabom kacaem kung( president adviser) U Ko Ko Hlaing loh athui.
Kolram Mawtkung U Thein Sein India la Yin ni
October 10, 2011 : Kol ram mawt kung (president) U Thein Sein hetah India ram la Kol barhan thai mawtkung abii neh lamhma cuek la yin ham Octotober 12 lam kaloh October 15 hil yalh ham yin laom ni tila reuter olthang dongah atueng sak.
Chin ram Matupi neh Paletwa kho 30 tluk ah caak Ook Bangba Ahap u ni Ati
October 11, 2011 : Takum 2011 November hla lamkaloh atong vitih Matupi township, Paletwa township khui kah Mara kho neh rhen ah kho 30 tluk bangba ahap uh nitila minglaom.
Kol ram ah Thong tla Thlang 6359 Loih ni Ati
October 12, 2011: Kolram pumtom ah thong katla thlang 6359 rhoek he October 12, 2011 hnin ah loih nah (amnesty) kapaek ni tila Kol barhan kah MRTV4 olthang dong ah October 11, 2011 hnin ah hoe nah akhueh.
Ko Zarganar neh Rhen ah Thlang 300 ni Aloih Pueng
October 13, 2011 : Myitkyina thong khui ah kho kum 35 tlaak ham la ati uh avoei li nah thong lam kaloih coeng palawm kathui thai, Ko Za Ka Na neh rhen ah khoram ham bii abi tih thong katla thlang 300 bueng ni aloih pueng tila NLD loh hoe nah akhueh.
Naypyidaw ah Barhan bii kabi thlang Imm phu Apaek uh Pawn ni
October 14, 2011- Naypyidaw kah barhan imm ah ayoe la aom sak ulamkaloh tahae hla boeih lamkaloh imm phu apaek pawn ni tila minglaom. Lahkha khui lamkaloh10% ayueh pa ni tila Naypyidaw kah barhan bii kabi thlang pakhat loh athui.
Kampalet Kah Thinglam Tai Avung uh kawng, Kol President Taeng ah Caa Athak uhni
October 18, 2011 – Southern Chin State Kampalet kho kah Chrih yum tu caa rhoek kah thing lamtai avung pa uthawng dong ah alung tling uhpawt tih thlang 100 hlaai kah sen thut neh Kol ram mawtkung (president) taengah ca thak ham kamhlah nah akhueh uh.
Khoram Angen ko ah Malayria Tloh Nat nah Akhoe uhthai Coeng
October 20, 2011 : Diklai hman ah malayria( hnaet phia) tloh nat nah aom nah khoram 108 khui kah pathum ah pakhat hlai he tah kho kumrha khui ah pil dong lamkaloh nat nah cana akhoe uhthai coeng tila athai la ahnuk bik la kathoeng Malayria nat nah report dong ah kathoeng dongah atueng sak.
Hnin hil ah Kachin ram kah Kaap Uthae Kawng
October 19, 2011- Kol rhalkap rhoek KIA kung sut puei taeng maeng 10 ahla na ah Kol rhlakap rhoek thoih uh phai. Hnin at ah ayol bik voei 8 tluk Kachin ram pum tom ah kaap uthae. Hnuk rhalkap barhan kut hmui lak ah let 2 la Kol barhan thai loh Kol rhalkap thlang muep neh akah.
Pakoku ah Tui len, Thlang ka Duek khaw om
October 21, 2011: Kho muep atlan dongah Magwe division, Pakoku ah shwe chawng tui abae coih dongah shwe chawng hlai tlawt ayo tih No. 3 Kah ngae block, Cun taih block, kah imm cana phung ki imm cana tui loh ayo dong dongah thlang kaduek khaw om tih thlang 60 tluk hma taa tila minglaom.
Rangoon ah Chin Thlangcueih 200 loh Humtun nah Akhueh
October 22, 2011: Khodaeng lungma atawng uthawng dongah Chin ram khui ah aom uthai voel muehla ramtloe la baat baat khong uh tih bii bila acaeh uh coeng dongah Chin thlang noe rhoek neh paeh tlaih tih Chin thlang cueih thlang 200 rhoek loh Rangoon ah humtun nah akhueh uh tih thui tuen nah akhueh uh tila minglaom.
Ngaihmang ham koi Rhamsa cana
October 23, 2011: Thlang hing tom loh khohnin takuem ahmuh uh rhamsa cana kah ngai hmang hamkoi cana moeh hmuh hang thai laom.
Diklai hman ah Akasang koek ayuk neh Akum Kasen koek Khopuei
Diklai hman ah Akasang Koek Ayuk Cana Spring Temple Buddha (Taluk ram) kah budha yuk tih Asang 420 feet sang laom. Diklai hman kah Akum Kasen bik Khopuei hetah Jericho, Palestinian Territories, the Old Testament as the "City of Palm Trees", ( Jericho, Palestine ram ) tih Kho athong nah kum hetah 9,000 BC apha coeng laom.
Kol ram kahBank cana Boeih Donglamkaloh Ramtloe Tangka Tho thai coeng
October 25, 2011 : Kol ramkhui ah barhan kah mingpuei neh akhueh uh Bank cana boei boeih lamkaloh ramtloe kah tangka tho ben sai thai coeng tila minglaom.
Kachin Nu Thlang Pako Athae akha naphoei ah Angaawn utih Duek
October 26, 2011 : North Shan ram, Kawt Khaing kho ben ah ti ah kho kasa huta thlang pako rhoek hetah athae akha na uh phoei ah angaawn utih duek tila minglaom. Aduek nataeng ah Kol rhalkap rhoek aom nah kungsut taengca ah tahae kabang la hnothae hathoeng tila Kachin nu rhoek loh athui. Kuli phueih sak ham atuuk uhtih akhuen uh phoei ah tahae kabang la angaawn uh tila khaw athui.
Malaysia kah Kol Embassy loh Visa Passport Asai pah
October 27, 2011: Malaysia ram ah "6P" barhan mingpuei nah(Visa passport) he Kol ram kah ahmuep la thuep thuep bii kabi thlang rhoek ham Kaula Lumpur kugsut Kol embassy lamkaloh Visa passport asai pacoeng tila Visa passport kakhueh coeng rhoek loh athui.
Canada Kapha Kol Thlangnoe rhoek loh Refugee cana Radio Arhaek
October 28, 2011- Thailand-Burma ramri ko ah karhae rha refugee rhoek neh Kol ramkhui ah khohong rhaita ko ah ka rhea rha rhoek ham ah titih Canada kungsut Kol rhoek kah buu pakhat la kaom Link buu rhoek loh Radio cana arhaek uhlaom.
Khokung rhoek kah Ahmuen ah Duem mueh la Kaap uthae
October 29, 2011 : Karen ram Myawady kho lamkaloh maeng 80 tluk ahlaa na ah akung kasut Kol rhalkap rhoek kah Bayint Naung camp he October 27 hnin ah KNU rhoek loh ahmuep la thuep thuep amae utih akah uh pung saeng dongah Kol rhalkap thlang 3 mat mat akah uh tih duek tila Thailand Security rhoek loh athui.
Bangkok kah Chin Thlang rhoek khaw Yong uh coeng
October 30, 2011: Thailand khopuei Bangkok he moeh ayalh hlan vaengah tuiloh muelh alii tih thlang kang buek pawn ni tila Thai barhan loh hoenah akhueh coeng dongah angen Bangkok khasut ah kaom thawng sang neh thlang rhoek atloe la boeih yong uh coeng laom. Te khui ah Chin thlang rhoek moeh tuibuek arhih uh dongah Bangkok neh ahla ngai la yong uh coeng tila minglaom.
Rhaek loh Thlang Mat adae tih Duek, Lunghoi loh Imm kang Ayo
October 31, 2011 : Arakan ram ah hlipuei ahli hnin October 19 hnin ah Mrauk Oo kho ah thlang pahnih he rhaekloh mat adae tih duek, Vuito pakhat neh Panaa pakhat khaw duek tila minglaom.
Diklai Thlanghing 7,000Millions Tling coeng
November 1, 2011: October 31,2011 hnin ah diklai thlanghing 7000millions aphacoeng tila buu puei United Nation loh hoenah akhueh. 7000 millions apha naham la diklai pumtom ah amanu bungkhui lamkaloh rhip athang uh vaengah Phillipine ram he hekah 7000millions atling nah alamhma cuek kho la ahmoel uhtih olthang cana dongah atuueng sak uh.
Cacang Thlang Athai Kun sak voel pawt ham College 500 Akham
November 2, 2011: Britain kah college 500 tluk ah European Union khui kah ram pawt atah cacang thlang athai rhoek, caa cang sak voel pawt ham Britain barhan loh hoe nah akhueh.
Hka Wan Bang kho ah Kol Rhalkap thlang 10 Mat Mat akah uh
November 3, 2011: Manmaw(Bamaw) district, Hka Wan Bang khoah KIA Kachin rhalkap neh Kol rhalkap rhoek akah uthae dong ah ayol bik Kol rhalkap thlang 10 mat mat akah patih duek, Kol rhalkap thlang muep bangha adang uh tila miglaom.
IMF Thlang tueih rhoek Kol ramlamkaloh Koep Baluh coeng
November 4, 2011: Kol ram khui kah tangka thophu neh paehtlaih tuuk kaai tih thovael nah khueh nathai ham neh bomcaem nah paek nathai ham Kol kho la kayin thlang International Monetary Fund(IMF) kah aham ca rhoek hlaem ah bal uh coeng tila minglaom.
Huta rhoek ham Kapai kung Thlangnoe 2 Angaawn utih Duek
November 5, 2011 : Hlaem Thursday hnin India ram Mumbai khopuei ah thlangnoe pahin angaawn utih aduek dongah court imm ah lai la atloek uh.
Khokung rhoek Arhoeng nahang thai ham Angoe Pueng tila UN loh ahnoel
November 7, 2011 : Ngaikhuek tiham koi la Kolramkhui ah om hangcoeng dae khokung rhoek kah ayawn neh paeh tlaih tih thovael nah angoe pueng tila Kolram ham UN thlang tueih V.J. Nambier loh athui.
Diklai hman kah Huta, Tongpa Ayet naben avai arhoi nahpawh
November 8, 2011: Diklai hman ah tahae ah huta, tongpa thlang atae uh vaeng ah tongpa rhoek he huta rhoek lakah 10% yet ngai laom.
CNA Aming Ahno natih Tangka Kacoi Thlang Kol rhalkap loh Atuuk
November 9, 2011: Chin National Army(CNA) kah aming ahno natih rhaengpuei taengah tangka phaisa kacoi thlang panit rhoi he tah November 5, 2011 hnin ah Kol rhalkap rhoek loh atuuk tila minglaom.
Rangoon -Mandalay Express Bus Cungku Thlang 9 Duek
November 15, 2011 - Rangoon – Mandalay highway motor car longpuei alen tloe dongah Rangoon neh Madalay longpuei ah yin aphueih tih akathak thuk akathak hang New Mandalar Tun Express Bus pakhat hetah Tada Oo kun sih tina taengah cungku dongah thlang 9 pahoi duek tih thlang 30 tluk bangha adang uh tila minglaom.
Myitkyina ah Bomb pook, Thlang 14 duek, Thlang 20hlai Bangha Adang
November 15, 2011: Kachin ram khopuei Myitkyina ah bomb apook khungdaeng dongah thlang 14 duek tih thlang 27 tluk bangha acaak uh tila minglaom.
2014 ah ASEAN Mawt Kung la Kol ram Atuek coeng
November 16, 2011: Kol ram loh 2014 kum vaeng ah The Association of Southeast Asian Nations (ASEAN) ram cana mawt kung la oltloek nah akhueh uh coeng tila minglaom.
Yalkhat khui ah Kaap uthae, Kol Rhalkap 20hlai Duek
November 18, 2011- Kayin ram Kawh Karaek kho ah Kol rhalkap neh Kayin rhalkap KNLA rhoek laklo ah kho hninrhuk khuiah kaap uthae tih Kol rhalkap thlang 20 hlai duek tila KNLA benlamkaloh athui.
NLD loh Register Saiham ah Oltloeh nah Akhueh
November 19, 2011: Rangoon kungsut NLD party kungpuei ah humtun nah akhueh uhtih tahae kabangla NLD party loh register sai ham la oltloek nah akhueh uh laom.
Malaysia ah Chin Thlang Angaawm tih Duek
November 20th, 2011 : Tahae hla 16 khohlaem ben khoyin tom vaengah Malaysia ram Kaulalampur khopuei Cameroon high land ah kaom Chin hoelca thlang pakhat tah Rangoon, Hmawbi ah kaom Thein Lin aming naloh tamca neh mat athun, alaih dongah duek tila minglaom.
Kachin Rev. Pastor neh Thlang 7 Kol rhalkap loh Atuuk
November 22, 2011 : North Burma, Kachin ramben ah rhal vawk athoh livaengah Shan ram Nam Kham kho kah tholh palh nah kakhueh pawh Kachin Baptist hotu pakhat neh Kachin thlang 7 hetah November 17, 2011 hnin ah Kol rhalkap rhoek loh atuuk laom.
Kachin Rev. Pastor neh Thlang 7 Kol rhalkap loh Atuuk
November 23, 2011 : North Burma, Kachin ramben ah rhal vawk athoh livaengah Shan ram, Nam Kham kho kah tholh palh nah kakhueh pawh Kachin Baptist pastor pakhat neh Kachin thlang 7 hetah November 17, 2011 hnin ah Kol rhalkap rhoek loh hmaeng akowl tih atuuk laom.
Paletwa ah DTH system Abuen Pani
November 24, 2011 : Chin ram Paletwa kah khotaeng khovai boeih loh Television chanel asawt na uhthai ham ah DTH system saeh 10 abuen pani tila minglaom.
Kol Private Bank lamkaloh Direct la Tangka Pat thai pawnni
November 25, 2011 : Kolram kah Central Bank loh Private bank 11 taenglamkaloh patoeng ramtloe lamkah tangka direct la pat nathai ham longpuei aong papawn ni tila minglaom.
Kumtling mueh Huta ca Ayu naphoei ah Kayoi kung Chin Thlang pakhat Atuuk uh
November 28th, 2011: Mizoram kah Central Anti Drugs Squad (CADS) rhoek loh kum tling mueh ahih aham tih a yu nabueng mueh la atloe tongpa rhoek taeng ah koep kayoi kung Chin thlang pakhat hetah November 24 ah atuuk uh tilaminglaom.
Mrs. Hillary Clinton Kolram la Apha pawn ni
November 29, 2011: American foreign minister, Secretary of State Hillary Rodham Clinton hetah Kolram la thangvuen November 30,2011 hnin ah kum 50 khui ah avoeikhat nah yinhamla hampha pawn ni tila minglaom.
Caphae rhoi Rhenten Kayu nah Thai hoelca Cadong
November 30, 2011 – Thailand ram Samut Songkram state ah kaom Mr. Wichai Tao amingnah akum 24 katling coeng thlang noe pakhat loh August 8 hnin ah Ms. Sirintara neh Ms. Thipawan aming nah akum 22 katling rhoi coeng caphae boeina rhoi hetah vai la rhenten ayu nah.
Kol rhalkap loh Huta 81 Asamphaih, 36 Angaawn tih Duek
December 2, 2011: Hla rhaet khuiah Kachin ram neh Shan ram khui ah akah uthae vaengah Kol rhalkap rhoek loh huta thlang 81hetah asamphaih coeng tih thlang 36 hetah angaawn tih duek tila Women’s League of Burma(WLB) loh athui.
American ah Karenni Catham Lamhma cuek la Acang
December 3, 2011 : American ram ah kho kathong Karenni khokung thlang rhoek loh ama mih kah Karenni catham aming naham ati uh tih lamhma cuek la acing sak uh coeng tila minglaom.
Phakant longpuei ah KIA neh Kol rhalkap Kaap urhoi, Kol rhalkap 5duek, 5 Bangha Adang
December 4, 2011: Kachin ram Phakant caeh nah longpuei ah Kolrhalkap ka phuei rhalkap truck pathum hetah Kachin rhalkap rhoek neh athlang rhoek loh longah amah utih tangpuem khui lamkaloh akah uh dongah Kol rhalkap rhoek thlang 5 duek tih 5 loh bangha adang tila KIA ben lamkaloh athui.
Ram khui kah Kho 300 ah NLD Office koep Aong ni
December 5, 2011 : Election committee loh party register sai sakcoeng atah National League Of Democracy(NLD) loh 1988-99 kum party sai cuek vaeng kabang la khotom ah committee neh office cana koep ong ham kam hlah nah akhueh uh tila minglaom.
Kol ramkah MP rhoek India la Democracy kawng Cang ham hapawk uhni
December 6, 2011: Diklaihman ah akalen koek democracy ram pakhat lakaom India ram kah parliament, constitution, aram auk ataem nah kawng cang ham ah Kol Parliament mawt kung U Thu Ra Shwe Man loh auk ataem vitih member of parliament (MP) thlang 20 neh rhen ah boei mang lamkaloh kaduem thlang 6 rhoek hetah December 11 hnin lamkaloh 17 hnin hil ah alam hma cuek la New Delhi la cet uhni tila India foreign India olthang The Asian Age olthang bu dongah atueng sak. (India parliament khui kah) http://www.youtube.com/watch?v=Fu8uqMEmyRE
