Chin ram Falam neh  Kol-India ramri kah olpuei la kaom Rih kho neh Falam lako kah Feet 24 ka kaa motor car longpuei he hlaem yalh January 18 hnin lam kaloh atong utih adaeng uh ah tahae kabang la athum puei rhoi tila minglaom.

Hekah motor car longpuei hetah  Falam kho, rhoeng sang buu  (Falam Social Development Association) loh akangmah natih daeng laom tih Chin barhan longkhaw bom caem nathai ham hno kan sai uh hang nitila prime minister U Hung Ngai loh athui tila minglaom.

Motor car longpuei daeng naham Falam kho, rhoeng sang buu  (Falam Social Development Association) benlam kaloh tangka phaisa khueh tawn naben aom pawt dongah  U Khuang Luai loh amah kah longdaeng nah  Saeh(JCB) pa nit he hno nahamapaek tih JCB driver ham thlang pahnih he hlakhat ah ting kyat 200,000/- neh avat utih adaeng uh coeng tila  U Khaung Luai loh Chin olthang khonumthung taeng ah athui tila atai tih atuueng sak.

Hekah motor car longpuei daeng naham la ramkhui neh ram tloe kah Chin thlang  rhoek taeng ah  bom nah tangka bih ham kamhlah nah kakhueh uh tilam khaw athui thil.

Atong utih adaeng uh motor car longpuei hetah hnuk vaeng kah long rhuem he feet 24 akaa la koep adaeng uhlaom. Ram khui kah thlang neh ram tloe lamkah Chin thlang rhoek taenglam kaloh bom nah kadang uthai atah hekah motor car longpuei he aloe la coeng nathai ham ah saeh pakhat vat ham la caai nah kakhueh uh tila minglaom.

Falam Social Development Association (FSDA)  hetah 2011 kum December vaeng ah Chin ram Falam kho ah atong utih asai uh ati.